Пойтахт илк бор FIFPro шафелиги остида ўтган маросимга мезбонлик қилди. Профессионал футболчилар халқаро федерациясининг йилда бир бор бўлиб ўтадиган Осиё-Океания минтақаси ассамблеяси Hilton меҳмонхонасида ташкил этилди.

FIFPro таклифига кўра, унда Лига мутахассислари бевосита иштирок этди ва футболчилар ҳуқуқларини ҳимоя қилиш масалалари юзасидан ўз фикр ҳамда таклифларини илгари сурди. Футболчи, клуб ҳамда Лига ўртасидаги муносабатлар тобора мураккаб жараёнга айланиб бораётгани сир эмас. Шундан келиб чиқиб, Ўзбекистон футболчилар уюшмаси ассамблеяга бир қатор футболчиларни ҳам таклиф этди: Санжар Турсунов, Валерий Кичин, Арихиро Центоку, Нилуфар Бахтиёрова, Кенжабиби Ирисбек қизи, Дилнура Абибулла қизи.

Ассамблеянинг иккинчи кунини МОҚ бош котиби Ойбек Қосимов ҳамда ЎФА биринчи вице-президенти Равшан Эрматов очиб берди. Кейинчалик Ассоциация вице-президенти Одил Аҳмедов, Уюшма раиси Камолиддин Мурзоев ва қўмита аъзоси Маҳлиё Сарикова, Лига бош директори Диёр Имомхўжаев иштирокида FIFPro аъзолари билан суҳбат ташкил этилди.