2 май куни ЎФФ Терма жамоалар марказида Мураббийлар кенгашининг навбатдаги мажлиси бўлиб ўтди. Унда ТЖМ раҳбари Асқар Толибжонов миллий терма жамоалар мурраббийларидан ҳисоботларни қабул қилди.

Дастлаб Ўзбекистон U-20 ёшлар терма жамоаси бош мураббийи Аҳмаджон Мусаев ўз ҳисоботини топширди ва апрель ойининг оҳирида Португалияда ўтказилган йиғин терма жамоа учун катта фойда келтиришини таъкидлади.

«15-19 апрель кунлари Тошкентда йиғин ўтказдик ва битта назорат учрашувида майдонга тушдик. Бу билан терма жамоага аъзо бўлган футболчиларнинг жисмоний ҳолатини кўздан кечирдик. Шундан сўнг Португалияга жўнаб кетдик ва у ерда Португалия ёшлар терма жамоасига қарши иккита ўртоқлик ўйинида майдонга тушдик. Айтиш мумкинки, мазкур ўртоқлик учрашувларида, шогирдларим кўрсатган ўйиндан кўнглим тўлди», - деди Аҳмаджон Мусаев.

«Португалияга қарши илк ўйинда футболчилар кўрсатмаларни тўлиқ бажаришди ва кучли рақиб устидан ғалаба қозонишга эришдик», дея қўшимча қилди Мусаев. «Учрашув бошида бир футболчимиз оғир жароҳат олиб сафдан чиқди. Лекин жамоа сафида ҳар қандай футболчининг ўрнини боса оладиган футболчилар борлиги бизни ҳурсанд қилмоқда. Илк учрашувда рақибни 2:0 ҳисобида мағлубиятга учратадик. Иккинчи ўйин биринчисига қараганда бироз қийинроқ кечди. Шундай бўлсада, шогирдларимнинг ҳаракатларидан тўла қониқдим. Навбатдаги йиғин май ойи ўрталарида ташкил этилади. 29 ва 31 апрель кунлари эса Ироқ ёшлар терма жамоасига қарши иккита ўртоқлик учрашувида майдонга тушамиз. Мазкур ўйинлар орқали терма жамоа футболчиларнинг июнь ойида бошланадиган жаҳон чемпионати баҳслари олдидан функционал ва жисмоний тайёргарлигини текшириб олиш имконияти бўлади», дея ўз ҳисоботини якунлади Аҳмаджон Мусаев.

ЎФФ Миллий терма жамоалар техник директори Рустам Акрамов ҳам ёшлар терма жамоасининг Португалиядаги йиғини, терма жамоанинг келажак ўйинлари олдидан катта тажриба бўлганини таъкидлади. «Ёшлар терма жамоасининг Португалияга қарши иккита ўйинини ҳам кўрдим. Бу ўйинлар менда, мутахассис сифатида катта таассурот қолдирди. Футболчилар тезкор қарши ҳужум уюштиришда, ўйин тезлигини юқори темпда ушлаб туришни жуда яхши мослаштириб олгани кўриниб турибди. Бошланажак жаҳон чемпионати баҳслари олдидан, бундай учрашувлар терма жамоа учун яхши мактаб вазифасини ўтаб беради», - дейди Акрамов.

Мусаевдан сўнг янги ташкил этилган Ўзбекистон U-19 ёшлар терма жамоаси бош мураббийи Алексей Евстафеев ўз ҳисоботини топширди.

«Апрель ойида Тошкентда илк маротаба йиғин ўтказдик. Шундан кейин БААда анъанавий тарзда ўтказиладиган «Emirates» Кубогида иштирок этдик. БАА ёшларига қарши ўйинда мазкур терма жамоанинг илк расмий учрашуви бўлгани учун ўйинда камчиликлар кўзга ташланди. Албатта, ўйиндаги камчиликлар вақти билан бартараф этилади. Бунинг устида ишлашимиз керак», - дейди Евстафеев.

«Умуман олганда БААдаги мусобақа янги тузилган терма жамоага номзод бўлган футболчиларни кўздан кечириш учун айни муддао бўлди. Ўтказилган барча учрашувларда мағлубиятга учраган бўлсакда, бу натижалар терма жамоанинг келажакдаги ўйинлари учун етарли тажриба бўлади. 12 май куни Тошкентда терма жамоанинг навбатдаги йиғини бошланади. Битта ёки иккита назорат учрашувларини ташкил этишни режалаштирмоқдамиз. Октябрь ойида бўлиб ўтадиган Осиё чемпионати саралаш баҳсларигача, шогирдларим етарли ўйин амалиётига эга бўлиб улгуришларига умид қиламан», дея ўз ҳисоботини якунлади Алексей Евстафеев.

Ўзбекистон U-17 ўсмирлар терма жамоаси бош мураббийи Дилшод Нуралиев ўз ҳисоботида апрель ойида Туркияда бўлиб ўтган ўқув-машғулот йиғини ва май ойи режалари ҳусусида тўхталиб ўтди.

«Туркия йиғинидан кўнглим тўлди. У ерда терма жамоа сафига келиб қўшилган бир қатор янги футболчиларни синовдан ўтказдик. Назорат учрашувларида яхши натижалар кўрсатдик», - деди Нуралиев. «Йиғин давомида ўзимиздан ёш жиҳатдан катта бўлган иккита жамоа билан ўйин ташкил этишни шахсан ўзим илтимос қилдим. Россия иккинчи дивизионида иштирок этувчи «Самара» ҳамда Украина иккинчи лигасида иштирок этадиган «Металлист» клуби ёшларига қарши учрашувларда шогирдларим гарчи мағлубиятга учраган бўлсаларда, ўзидан ёш жиҳатдан катта бўлган ўйинчилар билан ўйинда ўзларини йўқотиб қўйишмади. Ўйинларда ҳатто устунлик ҳам қилдик», дея қўшимча қилди Ўзбекистон ўсмирлар терма жамоаси бош мураббийи.

«15 май куни Тошкентда терма жамоа навбатдаги ўқув йиғинини бошлайди. Йиғин давомида иккита ёки учта рақибга қарши назорат учрашувларини ташкил этиш режамиз бор. Бу борада ТЖМ бизга кўмак беришига умид қиламан», дея ўз ҳисоботини якунлади Нуралиев.

Ўз навбатида Терма жамоалар маркази директори Асқар Толибжонов терма жамоаларнинг ўқув-машғулот йиғинларини юқори савияда ўтказиши ва назорат учрашувларини такшил этиш учун ТЖМ ҳар қандай ёрдамга тайёр эканлигини таъкидлади. «Биз миллий чемпионатимиз тақвимидан келиб чиқиб йиғинларни ташкил этишимиз мақсадга мувофиқ бўларди. Сабаби, ўсмирлар ва ёшлар терма жамоасига номзод бўлган футболчиларнинг аксарияти Олий ва Биринчи Лига баҳсларида ўйнашади. Агар футболчиларнинг йиғини учун қулай вақт ярата олсак, улар учун спарринг рақиб ҳам, ўртоқлик ва назорат учрашувлари учун рақиб ҳам топилади. Бу борада ҳар қандай ёрдамни аямаймиз», - дейди Толибжонов. ТЖМ директори шунингдек май ойи сўнггида Тошкентда Ироқ ёшлар терма жамоаси билан иккита ўртоқлик учрашуви ташкил этилишини тасдиқлади. Толибжоновга кўра 29 ва 31 май кунлари Ўзбекистон ёшлар терма жамоаси (U-20) Ироқ ёшлар терма жамоаси билан иккита ўртоқлик учрашувида майдонга тушади.

1998 йилда туғилган ўсмирлардан иборат Ўзбекистон U-16 ўсмирлар терма жамоаси бош мураббийи Темур Олимхўжаев сентябрь ойида Тошкентда бўлиб ўтадиган ўсмирлар ўртасидаги Осиё чемпионати саралаш баҳслари ҳақида ўз фикрини билдириб ўтди ва саралаш баҳсларига етарлича тайёргарлик кўрмасдан туриб, керакли натижага эришиб бўлмаслигини таъкидлади.

«Бу ёшда кучсиз рақибнинг ўзи бўлмайди. Барчаси рақибга нисбатан қандай тайёргарлик кўрилганига боғлиқ. Рақиб Япония бўладими, Мальдив ороллари термасими, аҳамияти йўқ. Асосийси, уларга қарши яхши ва мукаммал тайёргарликка эга бўлиш», - дейди Темур Олимхўжаев

«Айни пайтда май ойининг сўнггида Озарбайжон пойтахти Боку шаҳрида ҳар йили анъанавий тарзда ўтказилаётган «Каспий Кубоги» турнирига тайёргарлик жараёни бошланди. Бу орада халқаро тажриба тўплаш мақсадида хориж терма жамоалари билан ўртоқлик учрашувларини ташкил этиш режаси бор. Бу борада ЎФФ Терма жамоалар маркази ҳозирда Европа ва Осиё қитъасидаги терма жамоалар билан музокаралар бошлаган. Айни пайтда Озарбайжондаги йиғинга борадиган таркиб деярли аниқ. Аммо, терма жамоа сафига яна бир қатор футболчиларни чақириб, уларни кўрикдан ўтказиш ниятим бор», дея ўз ҳисоботини якунлади Олимхўжаев.