Махачқалъанинг "Анжи" клуби Россия чемпионатининг 27-турида "Рубин"ни қабул қилди ва 2:1 ҳисобида ғалаба қозонди. Ғалаба эса анча қийинчилик билан қўлга киритилди.

Биринчи бўлим давомида катта ташаббусга эга бўлган майдон эгалари қулай вазиятларни кўкка совуришди. Иккинчи бўлимда эса қозонликлар аста-секин ўйин суратини тенглаштириб, ўйин тугашига 8 дақиқа қолганида Ёременконинг голи эвазига ҳисобни очишди. Хиддинк ўша заҳоти майдонга иккинчи ҳужумчи — Траорени туширди. Ласина майдонга тушганига 3 дақиқа бўлганида ҳисобни тенглаштирди. Ўйин тугашига 1 дақиқа қолганида эса Это'О ғалаба тўпини киритишга муваффақ бўлди.

Ҳамюртимиз Одил Аҳмедов ўйинни захира ўриндиғидан кузатди. Фақатгина ҳакам томонидан қўшиб берилган дақиқаларда ўзбекистонлик футболчи тактик ўйинчи алмаштириш сифатида майдонга туширилди.

Ушбу ғалабадан кейин "Анжи"нинг очколари сони 50тага етди ва улар битта ўйин кам ўтказган "Зенит"дан 4 очко ортда боришмоқда. Санкт-петербургликлар эса айни дамда "Алания" билан баҳс олиб боришмоқда.