"Милан" бош мураббийи Пауло Фонсека Хаби Алонсонинг жамоаси ҳақида айтган гапларига қўшилмади.

Сешанба куни Леверкузенда бўлиб ўтадиган Чемпионлар лигаси ўйини олдидан "доришунослар" бош мураббийи "Милан" чуқур ҳимояланишга тайёрлигини айтди. Леверкузенлик футболчи Жонатан Та ҳам худди шундай фикрда гапириб, Италия жамоаларини ҳимоявий ўйинга урғу бергани учун уларни қийин рақиблар деб атади.

"Бугун мен Хаби Алонсонинг айтганларини ўқиб чиқдим. Италия жамоалари ҳақида гап кетганда, одамлар доим бир хил нарсани айтадилар - ҳимоя ва қарши ҳужум ўйинлари ҳақида. Мен бошқа нарсаларни "Милан" контекстида муҳокама қилишни афзал кўраман. Бизни шундай қабул қилишни хоҳламаймиз.

Шубҳасиз, эртага ҳимояланишга тўғри келади, чунки биз кучли жамоага қарши ўйнаймиз, лекин тўпни қабул қилганимизда биз ҳар доим ўзимизни кўрсатишни хоҳлаймиз", деди Фонсека матбуот анжуманида.