Хитойлик Ма Десин билан яна учрашдик. Кутилмаганда, Куала Лумпурда ўтказилган ОФК Конгрессида. У менинг ЎФФ Президенти Мираброр Усмонов билан келишимни билар экан. Қуюқ саломлашдик.

ЎФФ Президентидан интервью олиш ниятида эканлигини айтди. Мираброр Усмонов ҳам йўқ демади. Ма ҳақида Усмонов газетада ўқиганди.

Хитойлик журналист интервью учун бор-йўғи 15 дақиқа вақт сўради-ю, лекин 45 дақиқача бизни турғизмади. Барча саволларига жавоб олди. Қўлида ўша эски блокноти, ручкаси, диктофон ва фотоаппарат вазифасини бажариб берадиган айфони ҳамда елкасидан тушмайдиган рюкзаки бор эди.

Интервью охирида у Ўзбекистон футболининг тараққиёти ҳақидаги мақолалар босилган газеталарни ҳам берди. Мақтаниш учун эмас. Биз сўрагандик. Малайзияга келишимизни билиб олиб келибди. 7-8 тача газета. Муқоваси рангли. Ичида ҳам рангли саҳифалар бор.

Хитойнинг энг йирик ва машҳур спорт нашри ҳисобланган «Titan sports»да Манинг мақолалари ҳали ҳам чоп этиляпти. Ўзбекистонда олиб борилган тадқиқот рақамлар билан асослаб берилган. Фақат матндан иборат эмас демоқчиман. Масалан, ФИФА рейтингида Хитой ва Ўзбекистон эгаллаган поғоналар ўртасидаги фарқ йиллар ўтгани сайин ўзгариб борганлигининг сабаби ўрганилган.

Ма, шунингдек, Ўзбекистонда футболни ривожлантиришга доир Президент қарорларини интернетдан топиб, таржима қилдирган. Бу ҳақда катта мақола ҳам чоп этилган.

Ма 18 июнь куни яна Тошкентга келади. У Жаҳон чемпионати саралаш ўйинлари доирасидаги Ўзбекистон — Қатар учрашувини кузатади. У Ўзбекистонга мухлислик қилади. Ма учун ҳам Ўзбекистоннинг Жаҳон чемпионатига чиқиши манфаатлироқ. Айнан шундан кейин Хитой ҳукумати унинг мақолаларига янада жиддий муносабатда бўла бошлайди.