Шахмат бўйича Global Chess League 2024 мусобақаси якунига етди.

3—12 октябрь кунлари Буюк Британиянинг Лондон шаҳрида бўлиб ўтган турнирда дунёнинг энг кучли шахматчилари қатнашди. Ушбу мусобақада Нодирбек Абдусатторов ва Жавоҳир Синдоров турли жамоаларда қатнашди ва якунда таркибида Жавоҳир Синдоров бўлган Triveni Continental Kings жамоаси ғолибликни қўлга киритди. 10 тур давом этган баҳслардан сўнг икки жамоа финалга йўл олди.

Қизиқарлиси, Нодирбек Абдусатторов ва Жавоҳир Синдоров жамоалари финалда ўзаро тўқнашди. Дастлабки ўйинда Triveni Continental Kings жамоаси 9-7 ҳисобида ғалабага эришди. Абдусатторов бу баҳсда қора доналарда ўйнаб, Вей Йини мағлуб этган бўлса, Синдаров Ниҳал Сарин билан дуранг ўйнади.

Иккинчи баҳсда ҳам Alaskan Knights жамоаси мағлубиятга учради — 7-13. Абдусатторов бу сафар оқ доналарда ўйнаб, Вей Йига имкониятни бой берди. Ўйин тенг бўлиб турган пайтда ҳамюртимиз 79-юришда қўпол хатога йўл қўйди. Жавоҳир Синдаров эса иккинчи партияда ҳам Сарин билан дурангга имзо чекди.

Шу тариқа, Нодирбек Абдусатторов жамоаси турнирда иккинчи ўринни эгаллаб 250 минг АҚШ доллари миқдоридаги пул мукофоти совриндори бўлди.

Triveni Continental Kings жамоаси 500 минг АҚШ долларини қўлга киритди.