"Барселона" раҳбарияти жамоа таркибини эркин агентлар орқали кучайтириш ниятида.

Relevo хабарига кўра, Каталония клуби ҳали 1:1 қоидасига эришгани йўқ, шу боис айни дамда шартнома муддати тугайдиган футболчиларни нишонга олишмоқда. "Барселона" скаутлари "Арсенал" аъзоси Томас Парти ва "Лилль" аъзоси Жонатан Дэвид билан вазиятни диққат билан ўрганмоқда, уларнинг келишуви 2025 йилда тугайди. 1 январдан бошлаб улар бошқа клублар билан музокара олиб боришлари мумкин бўлади.

Парти ҳали "канонирлар" билан шартномасини янгилагани йўқ. Деку узоқ вақтдан бери ярим ҳимоячини кузатиб келмоқда, бироқ Микель Артета ўтган ёзда унинг клубни тарк этишига рухсат бермади.

Дэвидга келсак, ҳужумчи "Лилль"га янги шартнома имзолаш ниятида эмаслигини маълум қилган. Жорий мавсумда у 13 та ўйинда майдонга тушиб, 9 та гол урди ва 2 та голли узатмани амалга оширди.