“Навбаҳор” – “Бунёдкор” учрашувидан кейин ҳар иккала жамоа бош мураббийлари иштирокида матбуот анжумани бўлиб ўтди.

Мустафа Байрамов, «Навбаҳор» бош мураббийи: Футболчиларимиз ёмон ўйин намойиш этишмади. “Бунёдкор” кучли рақиб, бу клубга қарши ўйнаш ҳеч бир жамоага осон эмас. Шунга қарамасдан бугун ғалаба қозонишни мақсад қилгандик. Чунки сўнгги тўрт учрашувда яхши натижалар қайт этиб, мухлисларимизни хурсанд этиб келаётгандик. Шунингдек, футболчиларимизнинг ўзларига бўлган ишончлари ҳам ортиб бораётганди. Олмалиқдаги баҳсда катта куч сарфлаганимиз бугун яққол сезилди. Ўйлашимча, “Бунёдкор” шундай ўйнашда давом этса чемпионлик унвонини қўлга киритса керак.

Миржалол Қосимов, «Бунёдкор» бош мураббийи: Учрашув давомида тўлиқ устунликка эришганлигимиз боис ҳақли равишда ғалаба қозондик. Шу сабабли натижадан ҳам ўйиндан, ҳам тўлиқ қониқиш ҳосил қилдим. “Навбаҳор”нинг сўнгги турлардаги муваффақиятлари бизни асло чўчитгани йўқ. Аксинча, водийда мухлислар босими остида хотиржам ўйнаб бўлмаслигини яхши билардик. Умуман олганда бугун мезбонлар биттагина вазият яратишди холос. Қолган дақиқаларда шогирдларим катта ташаббусга эга бўлишиб, рақибга имкон беришмади. Игантий Нестеров жароҳати туфайли Тошкентда қолганди. “Навбаҳор” билан ўйинни ўтказиб олдик. Энди Таиланд вакили “Бурирам Юнайтед” ҳақида ўйласак бўлади