“Шўртан” – “Олмалиқ” (1:1) баҳси якунига етганидан сўнг майдон эгалари устози Эдгар Яковлевичнинг фикрлари билан қизиқдик.

— Ўйин қизиқ ҳамда тез кечди, бугун прессингга ҳам, қарши ҳужумларга ҳам, иштиёққа ҳам гувоҳ бўлдик. Биз иккинчи голни уришдан ташқари ҳамма ишни амалга оширдик. Фақат ғалаба қозона олмадик.

— Жамоа сардори Асрор Алиқуловнинг йўқлиги билиндими?
— Йўқ. Чунки Шавкат Раимқулов унинг ўрнини муносиб тарзда тўлдира олди.

— “Шўртан”ни бу ойда бирмунча қийин баҳслар кутиб турибди.
— Биз учун осон ўйиннинг ўзи йўқ. Ўзимга ҳам тез-тез ўйин ўтказиш ёқади, чунки шундагина жамоани бир хил тонусда ушлаб туриш мумкин. Тақвимга қарасак, 31 май куни 10-тур баҳсини ўтказамиз. 11-тур учрашуви эса 20 июнга қўйилган. Орадан йигирма кун нима қиламиз, ҳайронман. Ўйлайманки, йил бошида тақвим тузилаётганда бу каби ҳолатларни албатта эътиборга олиш зарур.