Шанба оқшомида Мадриднинг “Реал” клуби ўз майдонида “Барселона”га 0:4 ҳисобида имкониятни бой берди. "Эл-класико" якунида мадридликлар ҳужумчиси Винисиус Жуниор ва каталониялик ярим ҳимоячи Гави ўртасида майдонда тўқнашув юз берди.
"Ёқимли" сўзлар алмашиш пайтида Гави Винисиусга ишора қилиб, "Барселона" "Сантьяго Бернабеу"да тўртта гол уришга муваффақ бўлганини таъкидлади.
"Ҳа, ҳа. Аммо душанба куни мен “Олтин тўп”ни оламан", деб жавоб берди Винисиус.
Винисиус Жуниор "Олтин тўп"ни қўлга киритиш учун фаворит саналади. Мукофот 28 октябрь, душанба куни топширилади.
