Маълумки, миллий терма жамоамизнинг ЖЧ-2014 саралаш IV босқичида иккита ўйини қолди. Улардан бири 11 июнь куни маҳаллий вақт билан 20:00 (Тошкент вақти билан 16:00)да Сеул шаҳрида Жанубий Кореяга қарши бўлиб ўтса, 18 июнь куни сўнгги турда Тошкентда "Бунёдкор" стадионида Қатар терма жамоасини қабул қиламиз.
Эрон миллий терма жамоаси гуруҳдаги сўнгги ўйинларни бир вақтда ўтказишга эришиш учун аризабозлик қилиб юрганидан хабаримиз бор эди. Улар ўз ниятларига етишганга ўхшамоқда.
ОФК расмий сайтига ишонадиган бўлсак, 18 июнь куни Эрон терма жамоаси Жанубий Кореяда Ульсан шаҳрида корейсларга қарши майдонга чиқишади. Ўйиннинг бошланиши Сеул вақти билан 21:00 га белгиланган. Бизда эса бу вақтда соат 17:00 бўлади ва айни шу соатда миллий терма жамоамиз Қатарга қарши "Бунёдкор" стадионида саф тортади.
P.S. Бу ҳолат ҳали расман ўз тасдиғини топганича йўқ. Лекин ФИФА томонидан тўлиқ тасдиқланмаган соатлар нега ОФК расмий сайтида жойлаштирилгани бизни таажжубга солмоқда.
P.S.S. ЎФФ матбуот хизмати раҳбари Санжар Ризаев ўз твиттер аккаунти орқали ўйин вақтларининг бир вақтга тўғирлангани хусусида Федерацияга расмий хат келганини билдириб ўтди.
