"Вест Хэм" бош мураббий Хулен Лопетегини, агар натижалар яхшиланмаса, истеъфога чиқарилиши ҳақида огоҳлантирди.
Ўтган шанба куни жамоа "Ноттингем Форест"га 3:0 ҳисобида мағлуб бўлди ва айни пайтда "Вест Хэм" Премьер-лигада атиги 14-ўринни эгаллаб турибди.
Икки ҳафта олдин "Вест Хэм" "Тоттенхэм"дан 4:1 ҳисобида мағлуб бўлган эди.
"Вест Хэм" келаси шанба куни ўз уйида "Эвертон"ни қабул қилади. Жамоа АПЛ турнир жадвалининг қуйи қисмида жойлашган ва Лопетеги ўйин олдидан катта босим остида қолган.
The Times нашри хабарига кўра, Лопетегига клуб жадвалдаги ҳозирги мавқеини барқарор эмас деб билиши ва агар Хулен буни тез орада тузатмаса, унинг ўрнини бошқаси эгаллаши ҳақида огоҳлантирилган.
Лопетеги ўтган ёзда "Вест Хэм"ни қабул қилиб олганди. "Болғачилар" ўйин услубини яхшилаш умидида Давид Мойеснинг ўрнига Хуленни олиб келишди ва испаниялик мутахассис учун кучли трансфер кампаниясини олиб боришди, аммо сармоя ҳозирча ўзини оқламади.
