Германиянинг "Бавария" клуби "Арсенал" ва "Манчестер Юнайтед" хизматларига қизиқиш билдираётган вингер Лерой Санени қўйиб юборишга тайёр.
"Арсенал" анчадан бери Букайо Саканинг иш юкини енгиллаштириш учун ҳужумкор ўйинчи қидирмоқда.
"Манчестер Юнайтед" ўз навбатида Рубен Аморимнинг бош мураббий этиб келиши билан боғлиқ навбатдаги қайта қуриш арафасида турибди.
Bild нашри хабарига кўра, Англиянинг иккала гранди ҳам АПЛда аллақачон тажрибага эга бўлган, 4 мавсум "Манчестер Сити"да ўйнаган Санега кўз тикишган.
Саненинг амалдаги шартномаси мавсум охирида тугайди ва "Бавария" 28 ёшли германиялик футболчини янги шартномага кўндириш учун бироз ҳаракат қилди, аммо беҳуда.
Мюнхенда улар Санени клубга жуда қимматга тушаётганига ишонишади ва фақат маоши 25 фоизга камайтирилган ҳолда янги шартнома имзолашга тайёр, бу эса Леройга ёқмайди.
Афтидан, Сане энди "Бавария"ни тарк этади. Агар мюнхенликлар январь ойида Леройга харидор топа олмаса, вингер мавсум охирида эркин агент сифатида кетади.
