Germaniyaning "Bavariya" klubi "Arsenal" va "Manchester Yunayted" xizmatlariga qiziqish bildirayotgan vinger Leroy Saneni qo‘yib yuborishga tayyor.
"Arsenal" anchadan beri Bukayo Sakaning ish yukini yengillashtirish uchun hujumkor o‘yinchi qidirmoqda.
"Manchester Yunayted" o‘z navbatida Ruben Amorimning bosh murabbiy etib kelishi bilan bog‘liq navbatdagi qayta qurish arafasida turibdi.
Bild nashri xabariga ko‘ra, Angliyaning ikkala grandi ham APLda allaqachon tajribaga ega bo‘lgan, 4 mavsum "Manchester Siti"da o‘ynagan Sanega ko‘z tikishgan.
Sanening amaldagi shartnomasi mavsum oxirida tugaydi va "Bavariya" 28 yoshli germaniyalik futbolchini yangi shartnomaga ko‘ndirish uchun biroz harakat qildi, ammo behuda.
Myunxenda ular Saneni klubga juda qimmatga tushayotganiga ishonishadi va faqat maoshi 25 foizga kamaytirilgan holda yangi shartnoma imzolashga tayyor, bu esa Leroyga yoqmaydi.
Aftidan, Sane endi "Bavariya"ni tark etadi. Agar myunxenliklar yanvar oyida Leroyga xaridor topa olmasa, vinger mavsum oxirida erkin agent sifatida ketadi.
