Бугун Ўзбекистон футбол ассоциацияси раҳбарияти УЕФАнинг аёллар футболи бўйича мутахассислари Крис Милнес ва Элис Коссафи ҳамда ОФК мутахассиси Амир Ассокан бин Абдулла билан учрашди.

Учрашув аввалида Ўзбекистонда аёллар футболи ва футзали ривожланиб бораётгани қайд этилди. УЕФА вакиллари томонидан аёллар футболини ислоҳ этишда ОФК билан ҳамкорликда амалга оширилаётган ишлар кўлами янада кенгайиши зарурлиги, ушбу ҳамкорликдан мақсад Ўзбекистонда ва Осиёнинг бошқа бир қатор мамлакатларида аёллар футболига эътиборни кучайтиришдан иборат эканлиги таъкидланди ҳамда турли ёшдаги терма жамоалар, аёллар лигаси, оммавий футбол, ҳакамлик ва мураббийлар таълими сингари муҳим йўналишларни ўз ичига олган 3 йиллик дастур тақдим этилди.

ЎФА биринчи вице-президенти Равшан Ирматов сўнгги йилларда аёллар футболига эътибор тобора ортиб бораётганини алоҳида таъкидлаб, мамлакатимиз 2029 йилда аёллар футболи бўйича Осиё кубогига мезбонлик қилиши бунинг яққол исботи эканини қайд этди.

«Белгиланган режалар аниқ, бироқ уларни амалга оширишда бор имкониятимизни ишга солишимиз керак», деди Равшан Ирматов.

Шунингдек, ЎФА биринчи вице-президенти томонидан «Grassroots» ва «Football for Schools» дастурларида қизлар улушини ошириш, сўнгра уларни профессионал футболга жалб қилиш, аёл мураббийлар ва реферилар учун УЕФАга аъзо мамлакатларда ўқув курслари ташкил этиш бўйича дастурларни амалга оширишга оид муҳим таклифлар илгари сурилди.