Москванинг ЦСКА жамоаси яримҳимоячиси Аббосбек Файзуллаев Россия Кубогининг "РПЛ йўли" доирасида Қозоннинг «Рубин» жамоаси устидан 3:0 ҳисобидаги ишончли ғалабадан кейинги таассуротлари билан бўлишди. Футболчи мусобақанинг мураккаб тузилишига ҳали тўлиқ кўникмаганини тан олди.

«Ростини айтсам, ҳозирги Россия Кубоги форматига барча жиҳатлари билан тўлиқ тушунмайман. Барча деталларини ўрганишга чуқур киришмаганман. Менинг вазифам – ҳар бир кейинги ўйинга тайёргарлик кўриш. Шахсан менга плей-офф тизими кўпроқ ёқади, аммо бу мен учун принципиал аҳамиятга эга эмас. Келгуси босқичда қайси жамоа билан ўйнашимиздан қатъи назар, биз курашга тайёр бўламиз», – деди Файзуллаев «Советский Спорт» нашрига берган интервьюсида.

Ёш яримҳимоячи жамоанинг яқинлашиб келаётган ўйинларга эътибор қаратаётганини ва ҳозирча узоқни кўзламаётганини таъкидлади.

«Россия Кубоги бу мавсумда биз учун асосий мусобақага айланадими-йўқми, бу ҳақда гапиришга ҳали эрта. Ҳозирги барча фикрларимиз навбатдаги ўйинга тайёргарликка йўналтирилган. Биз ҳар бир ўйинда ғалаба қозонишга интиламиз ва бир неча ой олдиндан прогнозлар қилишни истамаймиз», – деб тушунтирди Файзуллаев.

«Рубин» билан тез-тез тўқнаш келиш ҳақидаги саволга жавоб берар экан, футболчи шундай деди:

«Бу мен учун аҳамиятсиз. Агар ўйин бўлса, биз тайёрланамиз ва майдонга чиқиб ўзимизнинг максимумимизни кўрсатамиз. Ўтган учрашувларнинг статистикасини таҳлил қилмайман, фақат олдинги ўйин ва машғулотларга эътибор қаратаман».