Мадриднинг «Атлетико» клуби сафарда «Вальядолид»ни 5:0 ҳисобида мағлуб этиб, ғалабалар сериясини давом эттирди.
«Матрасчилар» Ла Лиганинг 15-туридан ўрин олган шанба кунги ўйинда рақибларига ҳеч қандай имконият қолдирмади. Диего Симеоне жамоаси учун бу аллақачон барча турнирлардаги кетма-кет еттинчи ғалаба бўлиб, улардан бештаси рақиб майдонларида қўлга киритилган. Журналист Педро Мартиннинг сўзларига кўра, 2012 йилдан буён «Атлетико» биринчи марта кетма-кет бешта сафар учрашувида ғалаба қозона олди.
Бунгача Мадридликлар сафарда Чехиянинг «Спарта» (6:0), «Мальорка» (1:0), «ПСЖ» (2:1) ва «Вик» (2:0) клубларини мағлуб этганди. Охирги омадсиз сафар 27 октябрь куни бўлиб ўтганди – ўшанда «Бетис»га қарши ўйинда минимал мағлубият қайд этилганди.
