Голландия терма жамоаси бош мураббийи Луи ван Гал 2014 йилги Жаҳон чемпионатида ўз терма жамоасининг чемпион бўлишига ишонмаслигини таъкидлаб ўтган.
Жаҳоннинг амалдаги вице-чемпионлари 2010 йилги ЖЧ финалида Испания терма жамоасига 1:0 ҳисобида имкониятни бой берганидан хабарингиз бор. Лолалар юрти терма жамоаси бош мураббийи ушбу натижанинг келаси йил яхшиланишига умид қилаётгани йўқ: "Чемпион бўлишимиз ҳайратланарли ҳодиса бўларди, аммо мен бундай ўйламайман. Ҳозир сизга Бразилия-2014да ғолиб чиқишга Голландиядан кўра яхшироқ имкониятга эга бўлган саккизта терма жамоани санаб беришим мумкин", дейди голландиялик мутахассис ANP нашрига берган интервьюсида.
"Мен ҳар доим реал фикрлаганман. Жаҳон чемпиони бўлиш менинг ҳам орзуим. Мана шунинг учун ҳам ҳозир мураббийман", дея қўшимча қилган Голландия терма жамоаси бош мураббийи.
Эслатиб ўтамиз, Евро-2012да гуруҳ босқичидаёқ курашдан чиққан терма жамоа бош мураббийи Берт ван Марвейк истеъфога чиқарилганидан сўнг унинг ўрнига ван Гал тайинланган эди. Терма жамоанинг навбатдаги учрашуви 7 июнь куни Индонезия билан ўртоқлик учрашуви бўлади.
