«Todofichajes» порталининг сўзларига кўра, «Милан» франциялик дарвозабон Майк Меньян билан шартномани 2029 йилнинг ёзига қадар узайтириш бўйича фаол музокаралар олиб бормоқда.
Италия клуби бошлиқлари футболчининг маошини сезиларли даражада оширмоқчи. Янги шартномага кўра, юлдуз дарвозабон беш миллион евро олади. Шартномада турли мақсадларга эришиш учун бонуслар ҳам назарда тутилади.
Майк Меньян 2021 йилда «Милан»га ўтган эди. Франциялик футболчи «россонерилар» сафида 131 та ўйин ўтказиб, 135 та гол ўтказиб юборган ва 51 та ўйинда ўз дарвозаси дахлсизлигини сақлаб қолган. «Transfermarkt» дарвозабонни 35 миллион еврога баҳоламоқда.
