"Тоттенхэм"нинг англиялик ҳужумчиси Доминик Соланке "Манчестер Юнайтед" билан сўнгги 4 учрашувда 5 та гол урди.
Бу серия ўтган йили Доминикнинг собиқ жамоаси "Борнмут" "Олд Траффорд"да манкунианликларни 3:0 ҳисобида мағлуб этганидан кейин бошланган. Шундан сўнг, 2024 йилнинг апрелида "олчалар" Манчестер гранди билан дуранг ўйнашди ва Доминик яна "қизил иблислар" дарвозасига гол урди.
Ёзда клубини ўзгартирган Соланке "Шпорлар"нинг "Манчестер Юнайтед" устидан 3:0 ҳисобида ғалаба қозонган учрашувида гол уриш орқали серияни давом эттиришга муваффақ бўлди. Шундай қилиб, Англия Лига кубоги баҳсида Доминик манкунианликлар дарвозасига дубль қайд этди ва шу билан ўзининг голли сериясини узайтирди.
