"Гулистон" - "Металлург" ўйинидан кейин ўз фикрини билдириб ўтган Рустам Мирсодиқов мағлубият сабабини жамоа етакчи футболчиларининг жароҳат олгани билан изоҳлади.
"Жамоамиз жароҳатлар гирдобида қолган. Бугун ҳам икки нафар етакчи футболчимиз сафдан чиқди. Унга қадар Нурматов, Норбеков, Икромовда ҳам жароҳатлар бор эди. Назаримда, жамоамиз қандайдир қора чизиққа тушиб қолганга ўхшайди. Нима бўлган тақдирда ҳам охири бахайр бўлсин. Менимча, бугунги учрашув мухлисларга маъқул келди. Омад мезбонларга кулиб боқди. Агарда биринчи бўлимда Дилмурод Каримов юзага келган хавфли вазиятларни голга айлантирганда балки ўзйин бошқача натижада якунига етармиди?!
“Гулистон” ҳақида илиқ фикрлар билдириб ўтишим мумкин. Жамоа таркибининг асосини биринчи лигада тўп сурган футболчилар ташкил этади. Янги келганлар ҳам сирдарёликларнинг ўйинини кучайтиришгани кўриниб турибди. Энг қизиғи,улар футболга жуда ташналар. Аслида шундай ҳолатлар юзага келса, футболчиларда ғалабага бўлган иштиёқ пайдо бўлади", дейди "Металлург" бош мураббийи Рустам Мирсодиқов.
Неъматжон Аҳмедов
