Франция терма жамоаси дарвозабони Брис Самба "Ланс"дан "Ренн"га кўчиб ўтди.
Бу ҳақда "Ренн" клуби матбуот хизмати хабар берди.
Шартнома 2029 йилнинг ёзига қадар мўлжалланган, трансфер суммаси 15 миллион еврони ташкил қилади. Трансфердан кейин Самбанинг маоши икки баравар кўпайди: ойига 210 дан 500 минг еврогача.
30 ёшли дарвозабон 2022 йилнинг ёзидан буён "Ланс" сафида ўйнаб келаётганди. Умуман олганда, бу вақт ичида дарвозабон клуб сафида барча турнирларда 96 та ўйин ўтказиб, 96 та гол ўтказиб юборган ва 37 марта ўз дарвозаси дахлсизлигини сақлаб қолган.
"Ренн"нинг янги дарвозабон билан шартнома имзолаши 39 ёшли фахрий Стив Манданднинг жорий мавсумдаги ёмон ўйинлари билан боғлиқ.
Эслатиб ўтамиз, Самба Франция терма жамоаси футболчиси бўлиб, терма жамоа таркибида жами учта ўйин ўтказган.
