"Унион" "Бохум"га қарши ўйинда мухлиснинг ҳаракатлари туфайли техник мағлубиятга учради.
14 декабрь куни иккинчи бўлимга қўшиб берилган вақтда, 1:1 ҳисобида дуранг ўйнаган ҳолда, дарвозабон Патрик Древеснинг бошига буюм отилиши оқибатида жароҳат олди.
Ҳакам Мартин Петерсен Бундеслига учрашувини тўхтатишга қарор қилди ва жамоаларни майдондан ташқарига олиб чиқди. Жароҳат олган Древес дарҳол касалхонага юборилди.
28 дақиқалик танаффусдан сўнг ўйинни давом эттиришга қарор қилинди. "Бохум" барча мумкин бўлган алмаштиришлардан фойдаланган ва Кодзи Мийоси майдондан четлатилганидан кейин ўн киши билан ўйнаб, ҳужумчи Филипп Хофман дарвозага туришга мажбур бўлди. Иккала жамоа ҳам учрашув охиригача ҳужумкор ҳаракат қилмасликка қарор қилишди. Учрашув дуранг билан якунланди.
Германия футбол ассоциациясининг спорт суди "Бохум"га 2:0 ҳисобидаги ғалабани беришга қарор қилди, деб хабар беради Kicker нашри. Суд мажлисида кўплаб гувоҳлар, жумладан, ҳакам, ташриф буюрган гуруҳ шифокори ва Древес тингланди.
Қарор устидан 7 кун ичида шикоят қилиш мумкин ва "Унион" буни амалга оширади.
Шу билан бирга, Назорат қўмитаси жамоаларнинг ўйин охирида ҳужумга ўтмаслик қароридан норозилигича қолгани қайд этилган.
"Бундай хатти-ҳаракатлар рақобатга зиддир. Тасаввур қилинг-а, иккита жамоа натижа бўйича келишиб олди, учинчиси эса шу сабабли қуйи лигага тушиб кетди", деди DFB таркибий бўлими раҳбари Антон Нахрайнер.
