Якунига етаётган ойда “Нефтчи” жамоасида катта ўзгаришлар рўй берди. Бу эса турли хил асоссиз хабарларнинг тарқалишига ҳам сабаб бўлди. Ана шундай маълумотлардан бири – жамоа ярим ҳимоячиси Санжар Асқаралиев билан боғлиқ. Бир қатор интернет нашрларда ушбу футболчи “Нефтчи”дан кетди деб овоза қилишди. Аслида Асқаралиев ҳеч қаерга кетмаган, у жамоа билан бирга. Бу борада футболчининг ўзи шундай дейди: — Мен ҳеч қаерга кетганим йўқ. Жамоа билан бирга навбатдаги ўйинларга тайёргарлик кўряпман. Умуман олганда, бу хабарлар қаердан пайдо бўлганига ҳайронман. Жамоадаги муҳит яхши. Ҳаммамиз вазиятни ўнглаш учун ҳаракат қиляпмиз. Негадир бу йил омадимиз келмаяпти. Кутилмаган жойда очколар йўқотдик. Ўйлаймаки, бу ўткинчи ҳолат ва ҳали ҳаммаси яхши бўлади, — дейди Асқаралиев. “Нефтчи” ПФК матбуот хизмати