"Барселона"нинг чап қанот ҳимоячиси Алехандро Бальде Испания Суперкубоги финалида "Реал" устидан қозонилган ғалабадан сўнг (5:2) ўз ҳис-туйғулари билан ўртоқлашди.
21 ёшли испаниялик футболчи биринчи бўлимга қўшиб берилган ўнинчи дақиқада гол уриб, ҳисобни 4:1 кўринишига келтирди. Иккинчи бўлимда жамоалар яна биттадан гол уришди.
"Финалда "Реал" дарвозасига урилган гол ушалган орзу эди. Мавсум жуда узоқ, биз ҳар доим ҳам ғалаба қозона олмаймиз, аммо бугунги муваффақият бизга ишонч бағишлаши аниқ", - деди Алехандро Бальде Barca Centre билан суҳбатда.
"Барселона" мавсумдаги ўзининг биринчи совринини Ханс-Дитер Флик қўл остида қўлга киритди. Немис мутахассиси жорий мавсум бошланиши арафасида жамоа бошқарувини ўз қўлига олганди.
