Ўзбекистон терма жамоаси ҳимоячиси Абдуқодир Ҳусановнинг орзуси “Бунёдкор”да ўйнаш бўлган, аммо мураббийлар “асосий жамоага тортмайди”, деб “дублёр”га жўнатиб юборишган. Бу ҳақда у “Газета.уз”га берган интервьюсида маълум қилди.

"Клубда марказий ҳимоячилар жароҳат олганда, "дублёр"га чақиришди. Кўпроқ ўйнаганимда, асосий жамоага қўшилишим мумкин эди. 16 ёшимдан “Бунёдкор” асосий таркибидан жой олишни орзу қилардим. Аммо улар мени бизга тортмайди деб U-18 жамоасига жўнатиб юборишган. Кейин Беларусга кетдим", деди “Манчестер Сити” клубига ўтиши кутилаётган Абдуқодир Ҳусанов.

Суҳбат давомида футболчи ёшлигидан футболчи бўлишни орзу қилгани, отасининг эътибори ҳақида тўхталди.

“Дадам футболчи. Оиламиздан кўпчилик футбол тўгарагига боргани учун мен ҳам 5 ёшимдан футбол билан шуғулланишни бошлаганман. Дадам аралашмайман, дегани учун 7 ёшимда “Бунёдкор”га амаким олиб борган. Ҳар хил гап бўлмасин деган. Дадамларнинг ўйини ёққани учун ҳимояда ўйнашни хоҳлаганман.

Дадам кам мақтайди. Хатоларимни тўғрилашга ҳаракат қилади”, дея қўшимча қилди ҳимоячи.

Ўзбекистон терма жамоаси ҳамда “Ланс” клуби футболчиси Абдуқодир Ҳусанов “шаҳарликлар” билан 2029 йилгача шартнома имзолашга келишиб олгани ҳақида хабар берилган эди. Трансфер суммаси — 40 миллион евро.

Маълумот учун, “Ланс” Ҳусановни 2023 йил июль ойида “Энергетик-БГУ”дан 100 минг еврога сотиб олганди.

Ҳусанов Франция клуби сафида 31 та ўйинда майдонга тушиб, бир марта голли узатма амалга оширди. Унинг француз клуби билан тузган шартномаси 2027 йилнинг июнига қадар амал қилади.

Transfermarkt маълумотига кўра, унинг бозор қиймати 12 миллион еврога баҳоланган.