"Реал Мадрид" раҳбариятида италиялик мутахассис Карло Анчелотти келажакда "Лос Бланкос" бош мураббийи бўлиши борасида шубҳалар кучаймоқда. Бу ҳақда Relevo хабар бермоқда.
Манбага кўра, "Қироллик клуби" раҳбариятининг бир қисми "Реал"нинг "Милан" билан Чемпионлар лигаси ўйинидаги мағлубияти (1:3) ва Испания Ла Лигаси доирасида "Барселона" билан ўйиндаги йирик мағлубият (0:4) дан сўнг Анчелоттига ишонишни тўхтатган. "Қаймоқранглилар" Испания Суперкубоги финалида "кўк-анорранглилар"га мағлуб бўлгач (2:5) Анчелотти ишидан норозилик кучайди.
Таъкидланишича, агар испан гранди Чемпионлар лигаси плей-офф босқичига чиқа олмаса, у "деярли" ишдан бўшатилади. Анчелотти ўрнига бу лавозимда вақтинчалик "Реал Мадрид" директори Сантьяго Солари ишлаб туради. Шу билан бирга, "Қироллик клуби" президенти Флорентино Перес ҳозирда "Байер"ни бошқараётган Хаби Алонсонинг яқин орада жамоани бошқаришини ҳамон истайди.
