Бугун, 25 январь куни Неаполдаги "Диего Армандо Марадона" стадионида "Наполи" ва "Ювентус" жамоалари ўртасидаги муҳим учрашув бўлиб ўтди. "Наполи" ўз уйида 2:1 ҳисобида ғалаба қозонди.

Биринчи бўлимда "Ювентус" ҳужумчиси Рандаль Коло-Муани 43-дақиқада ҳисобни очди. Франциялик футболчи янги жамоаси сафидаги илк ўйиндаёқ гол уришга муваффақ бўлди.

"Наполи" эса иккинчи бўлимда ўзига келди ва ғалабани илиб кетди. 57-дақиқада Замбо-Ангисса ҳисобни тенглаштирди.

Орадан 12 дақиқа ўтиб неаполликлар пенальти тепиш ҳуқуқига эга бўлишди. Ромелу Лукаку ундан самарали фойдаланиб, жамоасини олдинга олиб чиқди.

Шундан сўнг, "Ювентус" ҳисобни тенглаштиришга ҳаракат қилган бўлса-да, "Наполи"нинг мустаҳкам ҳимояси бунга йўл қўймади.

Бу ғалаба "Наполи" учун жуда муҳим бўлиб, уларнинг чемпионлик пойгасидаги позициясини мустаҳкамлади. Жамоа ўз очколарини 53 тага етказиб олди.

Айни пайтда, "Ювентус" А сериянинг жорий мавсумида илк марта мағлубият аламини тортди.

Италия А серияси, 22-тур
Наполи – Ювентус 2:1 (0:1, 2:0)
Голлар: 0:1 – 43 Коло-Муани, 1:1 – 57 Замбо-Ангисса, 2:1 – 69, пенальти Лукаку.
Наполи – Мерет, Спинаццола, Жезус, Ррахмани, Ди Лоренцо, Мактоминей, Лоботка (Гилмор, 89), Замбо-Ангисса, Нерес (Нгонж, 90+2), Лукаку (Симеоне, 89), Политано (Маццокки, 82).
Ювентус – Ди Грегорио, Камбьязо (Савона, 65), Калулу, Гатти, Маккенни, Тюрам, Локателли (Дуглас Луис, 74), Гонсалес (Франсишку Консейсау, 74), Копмейнерс, Йылдыз (Мбангула, 65), Коло-Муани (Влахович, 82).
Огоҳлантиришлар: Камбьязо (45), Лоботка (72), Спинаццола (90+1), Копмейнерс (90+5).