Bugun, 25 yanvar kuni Neapoldagi "Diyego Armando Maradona" stadionida "Napoli" va "Yuventus" jamoalari o‘rtasidagi muhim uchrashuv bo‘lib o‘tdi. "Napoli" o‘z uyida 2:1 hisobida g‘alaba qozondi.

Birinchi bo‘limda "Yuventus" hujumchisi Randal Kolo-Muani 43-daqiqada hisobni ochdi. Fransiyalik futbolchi yangi jamoasi safidagi ilk o‘yindayoq gol urishga muvaffaq bo‘ldi.

"Napoli" esa ikkinchi bo‘limda o‘ziga keldi va g‘alabani ilib ketdi. 57-daqiqada Zambo-Angissa hisobni tenglashtirdi.

Oradan 12 daqiqa o‘tib neapolliklar penalti tepish huquqiga ega bo‘lishdi. Romelu Lukaku undan samarali foydalanib, jamoasini oldinga olib chiqdi.

Shundan so‘ng, "Yuventus" hisobni tenglashtirishga harakat qilgan bo‘lsa-da, "Napoli"ning mustahkam himoyasi bunga yo‘l qo‘ymadi.

Bu g‘alaba "Napoli" uchun juda muhim bo‘lib, ularning chempionlik poygasidagi pozisiyasini mustahkamladi. Jamoa o‘z ochkolarini 53 taga yetkazib oldi.

Ayni paytda, "Yuventus" A seriyaning joriy mavsumida ilk marta mag‘lubiyat alamini tortdi.

Italiya A seriyasi, 22-tur
Napoli – Yuventus 2:1 (0:1, 2:0)
Gollar: 0:1 – 43 Kolo-Muani, 1:1 – 57 Zambo-Angissa, 2:1 – 69, penalti Lukaku.
Napoli – Meret, Spinassola, Jezus, Rraxmani, Di Lorenso, Maktominey, Lobotka (Gilmor, 89), Zambo-Angissa, Neres (Ngonj, 90+2), Lukaku (Simeone, 89), Politano (Massokki, 82).
Yuventus – Di Gregorio, Kambyazo (Savona, 65), Kalulu, Gatti, Makkenni, Tyuram, Lokatelli (Duglas Luis, 74), Gonsales (Fransishku Konseysau, 74), Kopmeyners, Yildiz (Mbangula, 65), Kolo-Muani (Vlaxovich, 82).
Ogohlantirishlar: Kambyazo (45), Lobotka (72), Spinassola (90+1), Kopmeyners (90+5).