"Фенербахче" ўз сайтида ҳужумчи Андерсон Талисканинг трансфери якунланганини эълон қилди. 30 ёшли бразилиялик футболчи "канарейкалар" билан бир ярим мавсумга - 2026 йилнинг ўрталарига қадар ҳисобланган меҳнат шартномасини имзолади. Талиска "Ан-Наср"дан "Фенербахче"га ўтди.
Ҳужумчи Саудия клубида уч ярим йил ўйнади. Бу вақт ичида Талиска 104 та ўйин ўтказди, жумладан, Криштиану Роналду билан ёнма-ён ўйнади. "Ан-Наср" таркибида бразилиялик футболчи 76 та гол урди ва 10 та голли узатмани амалга оширди.
"Фенербахче" бош мураббийи Жозе Моуриньо ҳисобланади. Жамоа айни дамда Туркия Суперлигаси турнир жадвалида иккинчи ўринда бормоқда.