Олдин хабар берганимиздек, 31 май куни “Тўқимачи” стадионида Тошкентнинг “Истиқлол” ҳамда Ироқ ёшлар терма жамоалари ўртасида ўртоқлик учрашуви ўтказилди.

Бу ўйин ҳар икки жамоа учун ҳам керакли ва фойдали баҳс бўлди. Ироқликлар бунгача Ўзбекистон ёшлар терма жамоаси билан икки марта ва “Бунёдкор” ёшлари билан бир марта ўртоқлик ўйини ўтказишган эди. Ўйин услуби юқоридаги жамоалардан фарқ қилувчи “Истиқлол” билан бахс орқали Ироқ мураббийлари турли хил услубда ўйновчи жамоаларга қарши учрашувларда қўллашлари мумкин бўлган тактик услубларни синовдан ўтказиб олишган бўлса, Ўзбекистон Биринчи лигасида қатнашувчи “Истиқлол” жамоаси учун бу бахс ўзига хос синов бўлди. Ҳар ҳолда, ўз ёш тоифасида Осиёда иккинчи бўлган жамоа билан ўйин орқали таркибдаги барча футболчиларнинг ҳолатини синовдан ўтказиб олишга имкон бўлди.

Учрашувнинг биринчи бўлимида “Истиқлол” Биринчи лигада иштирок этувчи таркиб билан майдонга тушди. Дастлабки 45 дақиқалик деярли тенг курашлар остида кечди, фақат айрим эпизодларда ироқликлар бироз устунлик қилишди. Шунингдек, биринчи бўлимнинг эсда қоларли вазиятларидан яна бири, 28-дақиқада Ироқ ёшлар терма жамоаси аъзоси 11 метрлик жарима зарбасидан унумли фойдалана олмади.

Иккинчи бўлимда эса “Истиқлол” жамоаси таркибида асосан иккинчи лигада тўп тепувчи футболчилар майдонга туширилди. Бу эса ўйинга таъсир ўтказди. Ироқ ёшлари иккинчи бўлим давомида устунликни ўз қўлларида ушлаб туришди. Бўлим бошидаги иккита тезкор гол жамоага қўшимча ишонч берди ва уёғига ўйин охирига қадар ироқликлар хотиржамликни сақлаб туришди. Шу билан бирга “Истиқлол” дарвозасига яна иккита тўп киритишга ҳам муваффақ бўлишди.

Шундай қилиб, ажойиб руҳда ўтган ўйин Ироқ ёшлар терма жамоасининг 4:0 ҳисобидаги ғалабаси билан якунига етди.

Ўртоқлик учрашуви.
31 май, “Тўқимачи” стадиони.
“Истиқлол” – Ироқ ё.т.ж. 0:4. (0:0)
Ҳакамлар: Азиз Асымов, Олим Абдувасилов, Санжар Шоюсупов.
Захирадаги ҳакам: Марат Исмоилов