Каталониянинг «Барселона» клуби бош мураббийи Тито Виланова жамоадан кетган ва кетиши мумкин бўлган футболчилар борасида гапириб ўтди.

«Абидал билан шартномани узайтирмаслик — бу раҳбарларнинг биргаликда чиқарган қарори. Мен бу вазиятни эшитиб ўзимни жуда ёмон ҳис қилдим. Биз ҳам чап, ҳам марказда унингдек тўп сурадиган бошқа футболчи топа олмаслигимизни яхши тушуниб турибмиз. Умид қиламанки, Эрик кучли жамоаларга боради ва у ерда унга имкон беришса, у ўзини ҳали-ҳамон юқори даражадаги жамоада кўрсата олишини исботлайди».

«Биз ҳимоя чизиғини кучайтиришимиз керак, бу ҳақда олдин ҳам гапириб ўтганман. Шу билан бирга Пуйолнинг ҳам сафга қайтишидан умидвормиз. У кейинги мавсумда ҳам бизга ёрдам бера олишига ишончим комил. Ундаги профессионеализмга шубҳа қилиб бўлмайди».

«Виктор Вальдеснинг жамоада яна бир йил қолишга қарор қилганидан ҳеч қандай муаммони кўрмаяпман. Вильянинг келажаги борасида ҳозирча бирор нарса дея олмайман. Аммо ўтган мавсумда ҳам унинг ўйинига ижобий баҳо бергандим».

«Тиаго Алькантарага келадиган бўлсак, айтишим мумкинки, у жуда муҳим футболчи. Агар унинг келажаги «Барселона» билан боғлиқ бўладиган бўлса, бундан хурсанд бўлардим. Аммо буни ўзи ҳал қилади», дея Виланованинг сўзларидан иқтибос келтирмоқда «Барселона» расмий сайти.