Хабарингиз бор, эртага футзал бўйича аёллар ўртасида CAFA мусобақасининг дастлабки учрашувлари бўлиб ўтади.

Бугун Тожикистон пойтахтидаги "The Rumi Hotel" меҳмонхонасида терма жамоа расмийлари иштирокида ўйиндан аввалги тадбирлар ҳамда бош мураббийлар иштирокида матбуот анжумани бўлиб ўтди.

“Бу ерда таниш инсонларни, мураббийлар, дўстларимизни кўриш ёқимли. Мусобақага яхши тайёргарлик кўрдик. Яқинда бўлиб ўтган Осиё Кубоги саралаши билан солиштирганда таркибимизда янги футболчилар бор ва улар ҳам ўзларини максимал равишда ижобий томондан кўрсатишади, деган умиддаман. Биз рақибларни ҳурмат қиламиз, лекин ҳеч кимдан қўрқмаймиз. Барчага омад тилаб қоламан”, - деб бошлади Фаррух Зокиров.

"Шубҳасиз, Эронга қарши ўйинлар биз учун доимо фойдали бўлади. Ушбу жамоа нафақат Марказий Осиёда балки бутун қитъада етакчилардан ҳисобланади.

Ўзбекистонда яқинда футзал федерацияси ташкил этилди. Федерация томонидан футзал бўйича турли турнирларни ўтказиш бўйича ишлар олиб борилмоқда. Албатта, терма жамоага қизларни чемпионат орқали саралаб олишмақсадга мувофиқ бўлади".

Эрон терма жамоаси устози: Мазкур мусобақада уч маротаба ғалаба қозонганмиз ва бу сафар ҳам Душанбе шаҳрига чемпионликни кўзлаб келдик. Яна бир бор CAFA мусобақаси бош совринини қўлга киритмоқчимиз.

Шунингдек, Фурузан Сулаймоний Осиё Кубоги ва шу каби турнирларда нафақат Эрон ва Ўзбекистон балки бошқа жамоалар ҳам иштирок этишини исташини айтиб ўтди. Бундан ташқари Сулаймони CAFA ташкилотчилари кейинги мусобақаларда қитъанинг бошқа қисмидан ҳам жамоаларни таклиф қилишса, яхши бўлишини айтиб ўтди.

Таъкидлаш лозим, Туркманистон терма жамоа бош мураббийи Камил Мингазов ва Қирғиз Республикаси термаси бош мураббийи Эркин Жунушалиев Ўзбекистон ва Эрон терма жамоаларини Осиё Кубоги финал босқичига чиққани билан табриклашди.