"Челси" бош мураббийи Энцо Маресканинг фикрича, жамоа қишки трансфер ойнасининг сўнгги кунида ўйнамаслиги керак эди.
3-февраль оқшомида “кўклар” АПЛ доирасида “Вест Хэм”га қарши ўйин ўтказди ва унда 2:1 ҳисобида ғалаба қозонди.
Бу вақтда Англияда трансфер ойнаси ёпилаётганди. Иккинчи бўлим бошида ҳужумчи Николас Жексон жароҳат олди ва кейинроқ маълум бўлишича, у апрелгача майдонга туша олмайди.
Сенегаллик футболчининг ўрнини эгаллаган Марк Гиу ҳам касалхонага ётқизилди. Шу тариқа лондонликлар узоқ муддат ҳужумчиларсиз қолишди.
"Ўйлайманки, белгиланган муддатда ўйнаш мутлақо нотўғри бўлди. Ўйин 22:00да якунланди ва трансфер ойнаси 23:00да ёпилди.
Бир ўйинда иккита ҳужумчи жароҳатини олдиндан кўра олмасдик", - дея Маресканинг сўзларини келтирмоқда Standard Sport.
