Дортмунднинг "Боруссия" клуби ҳужумкор ярим ҳимоячиси Жейми-Байно Гиттенс Англия Премьер-лигасига ўтиши мумкин. Бу ҳақда Bild журналистлари хабар бермоқда.
Манбага кўра, 20 ёшли вингер хизматига Лондоннинг учта клуби қизиқиш билдирмоқда. Гап "Арсенал," "Челси" ва "Тоттенхэм" ҳақида кетмоқда. Ўз навбатида "асаларилар" ҳам футболчи учун камида 102 миллион евро тўлашса, у билан хайрлашишга тайёр.
Жорий мавсумда Гиттенс 33 та ўйин ўтказди. Ярим ҳимоячи ўз ҳисобига 11 та гол ва бешта голли узатмани ёздириб қўйди. Transfermarkt портали экспертлари унинг нархини 50 миллион деб баҳоламоқда.
