Каталониянинг «Барселона» клуби билан 5 йиллик шартномага имзо чеккан Неймарнинг трансфери 57 миллион еврога тушгани борасида хабар бериб ўтгандик. Ушбу харид билан Неймар дунёнинг энг қиммат тўққизинчи футболчисига айланди.

«Stadion.Uz» аниқлашича, шу билан бир вақтда футболчи «Барселона» тарихидаги иккинчи энг қиммат футболчига айланди. Бунгача Ибраҳимович учун «Барселона» 61 миллион евро сарфлаганди. Агар Ибра учун берилган пулнинг тахминан 25 миллион евроси Самуэль Это’Они алмаштиришга сарфланганини ҳисобга олсак, «Барселона» тарихида тўлиқ сумма тўлаган энг қиммат футболчи айнан Неймар бўлди.

Яна бир қизиқ факт. Неймаргача ҳали бирорта қитъалараро трансфер дунёнинг топ-трансферлари қаторига кирмаганди. Кучли ўнликни ташкил этган трансферларнинг барчаси Европа клубидан бошқа бир Европага клубига кўчиб ўтишлар бўлган. Неймар бу борада Жанубий Американинг энг қиммат сотилган футболчисига айланиб олди.

Қуйида дунёнинг энг қиммат ТОП-11 трансфери билан танишиб олишингиз мумкин бўлади.

1. Криштиану Роналду («МЮ» — «Реал») — 94 миллион евро.
2. Зайниддин Зидан («Ювентус» — «Реал») — 74,5 млн.
3. Фигу («Барселона» — «Реал») — 70 млн.
4. Кака («Милан» — «Реал») — 64,5 млн.
5. Златан Иброҳимович («Интер» — «Барселона») — 61 млн.
6. Фалькао («Атлетико» — «Монако») — 60 млн.
7. Халк («Порту» — «Зенит») — 59,5 млн.
8. Фернандо Торрес («Ливерпуль» — «Челси») — 58,5 млн.
9. Неймар («Сантос» — «Барселона») — 57 млн.
10. Эрнан Креспо («Парма» — «Лацио») — 55,5 млн.
11. Жанлуиджи Буффон («Парма» — «Ювентус») — 52,5 млн.