«Барселона»нинг собиқ футболчиси ва скаутлар гуруҳида ишлаган Боян Кркич Габриэл Жезус каталонияликлар сафида катта муваффақиятга эришиши мумкин, деб ҳисобламоқда.

Кутилишича, Жезус душанба куни Барселонага етиб келади ва ёзги трансфер ойнаси ёпилиши олдидан клубга ўтиш жараёнини якунлайди. Боян бразилиялик ҳужумчини яхши билади — у Жезус «Манчестер Сити»да ўйнаган даврда футболчи ҳақида скаутлик ҳисоботлари тайёрлаган.

«Мен уни жуда қўллаб-қувватлаганман. Ҳисоботлар жуда яхши эди. У ҳали «Сити»да ўйнаётган, «Арсенал»га ўтишидан олдин кетиши мумкинлиги ҳақида гаплар чиққан пайтда уни икки марта жойига бориб кузатганман. Бу фақат менинг фикрим эмас эди», — деди Боян.

Сўнгги мавсумлардаги жароҳатларга қарамай, Кркич Жезуснинг футболчилик сифатларига юқори баҳо бермоқда.

«У техника жиҳатидан жуда кучли футболчи. Икки оёғида ҳам эркин ҳаракат қилади, тўпни яхши олиб юради ва тор ҳудудларда жуда тез қарор қабул қилади.

Габриэл Жезус тоза марказий ҳужумчи эмас. У жарима майдонининг турли нуқталарида пайдо бўлиши, қанотларга чиқиши мумкин. Ханси Флик айнан шуни истайди — футболчилар доимий равишда позиция алмашиб туришини», — деди у.

Боян, шунингдек, бразилиялик футболчининг прессинг ва ҳимояда ишлаш қобилиятини ҳам алоҳида таъкидлади.

«У жуда меҳнаткаш. Жамоа учун ўйнайди ва биринчи прессингда катта ҳажмда иш бажаради. Прессинг қилиш керак бўлса, у бу ишга тўлиқ киришади», — деди Кркич.

Бироқ у Жезусни фақат голлар сони билан баҳолаш нотўғри эканини ҳам қайд этди.

«У кўпроқ комбинацион ўйинчи, классик тўпурар эмас. Унинг рақамлари ҳеч қачон буюк голеадорларникидек бўлмаган, аммо у жуда тор ҳудудда ҳам шериклари билан яхши комбинация қила олади.

У орқага тушади, ҳаракатланади, рақиб ҳимоя чизиғини бузади ва жуда тез фикрлаб, тез ижро этади. Унинг энг катта кучи — жамоавий-комбинацион ўйини», — деди Боян.

Кркичнинг фикрича, Жезус айниқса чуқур ҳимояланадиган рақибларга қарши «Барселона»га жуда фойдали бўлиши мумкин.

Шу билан бирга, асосий савол унинг жисмоний ҳолати билан боғлиқ. Жезус оғир тизза жароҳатидан сўнг узоқ вақт мунтазам ўйин амалиётига эга бўлмади.

«У тикланган ва тўлиқ интенсивликда машғулот қиляпти, аммо унга мунтазам машғулотлар ва ўйинлар керак», — деди Боян.

Унинг фикрича, Флик футболчиларни энг яхши ҳолатига қайтаришни билади ва бу Жезусга ҳам ёрдам бериши мумкин.

«Бу — олтин имконият. Унда характер бор, майдонда агрессив, тезликни ўзгартира олади ва вазиятни якунлаш сифатига эга. У клуб учун катта муваффақиятга айланиши мумкин», — деди Кркич.