"Манчестер Юнайтед" сардори Бруну Фернандеш Англия кубоги доирасида "Фулхэм"дан учралган мағлубиятдан кейин ўз фикрларини билдириб ўтди.
Португалиялик футболчи “қизил иблислар”ни асосий вақтда мағлубиятдан қутқариб, 71-дақиқада ҳисобни тенглаштирди. Қўшимча бўлимларда гол ўтказилмади, ўйиндан кейинги пенальтиларни эса “Фулхэм” футболчилари аниқроқ бажаришди – 4:3.
“Ўйин бизнинг назоратимиз остида ўтди. Биз ўтказиб юборган голга келсак, биз ҳафта давомида "Фулхэм"нинг тўплари ҳақида кўп гаплашдик ва бу эпизодда тезроқ бўлишимиз керак эди. Биринчи бўлимда имкониятларимиз бўлди, иккинчи бўлимда эса ундан ҳам кўпроқ. Қўшимча бўлимларда “Фулхэм” устунликка эга бўлди, аммо имкониятларимиз кўпроқ эди. Пеналтилар сериясида рақиб шунчаки самаралироқ бўлди", - деди Фернандеш United Stand билан суҳбатда.
