"Барселона" бош мураббийи Ханс-Дитер Флик яна бир бор вингер Ламин Ямалнинг голсизлиги ҳақидаги саволга жавоб қайтарди.
Якшанба куни 17 ёшли футболчи "кўк-анорранглилар"га "Реал Сосьедад"ни йирик ҳисобда мағлуб этишга ёрдам берди (4:0), аммо голларнинг ҳеч бирида бевосита иштирок этмади. Вундеркинд сўнгги беш ўйинда бирорта ҳам гол ура олмади, Ла Лига доирасида эса сўнгги бор октябрь ойида Мадриднинг "Реал" клубига қарши кечган баҳсдан гол урган эди.
"Ямал гол уришни истайди, аммо биз учун футболчиларнинг сўнгги пасни бера олиши ҳам муҳим. У ҳар доим шериклари учун қулай вазиятлар яратишга ҳаракат қилади - у буни яхши уддалайди. Эртами-кечми Ламин гол уради. Бу нормал ҳолат, у кўп фойдали ишлар қилмоқда. Охир-оқибат, жамоа 4:0 ҳисобида ғалаба қозонса, айнан ким гол уриши муҳим эмас. Ўйлайманки, ҳамма мамнун," - деди Флик матбуот анжуманида.
