"Пахтакор" Элит Чемпионлар Лигаси нимчорак финалида 4 март куни Осиёнинг энг кучли клубларидан бири "Ал-Ҳилол"га қарши "Жар" стадионида майдонга тушади.
Тошкентликлардан Сардор Собирхўжаев дисквалификация сабабли беллашувни ўтказиб юборади.
"Ал-Ҳилол"ни ҳозирда португалиялик мутахассис Жорзе Жезуш бошқармоқда. Риёдликлар Саудия Арабистони чемпионатида 19 бор, мамлакат ички кубокларида 37 марта, Чемпионлар Лигасида 4 бор зафар қучишган.
Жамоалар айни пайтга қадар 8 марта тўқнаш келишган. Улардан 5тасида "Ҳилол" зафар қучган бўлса, 3 беллашув дуранг билан якунланган. "Пахтакор" ўзаро ўйинларда 5 тўп киритган бўлса, рақиб 15 бор гол урган. Игорь Сергеев икки бор Риёд жамоаси дарвозасини ишғол қилишга эришган.
"Пахтакор" ҳамда "Ал-Ҳилол" Осиё Чемпионлар Лигасида энг кўп марта қатнашган клублар ҳисобланади - 19тадан.
"Ҳилол" таркибида Боно, Кулибали, Канселу, Милинкович-Савич, Невеш, Малком, Салим Давсари, Митрович сингари юлдузлар ҳаракат қилишмоқда.
"Пахтакор" ва "Ал-Ҳилол" жамоалари ўртасидаги нимчорак финал баҳси 4 март, сешанба куни "Жар" стадионида 21:00да бошланади. Жавоб учрашуви 11 март куни Риёдда бўлиб ўтади.
