"Paxtakor" Elit Chempionlar Ligasi nimchorak finalida 4 mart kuni Osiyoning eng kuchli klublaridan biri "Al-Hilol"ga qarshi "Jar" stadionida maydonga tushadi.
Toshkentliklardan Sardor Sobirxo‘jayev diskvalifikasiya sababli bellashuvni o‘tkazib yuboradi.
"Al-Hilol"ni hozirda portugaliyalik mutaxassis Jorze Jezush boshqarmoqda. Riyodliklar Saudiya Arabistoni chempionatida 19 bor, mamlakat ichki kuboklarida 37 marta, Chempionlar Ligasida 4 bor zafar quchishgan.
Jamoalar ayni paytga qadar 8 marta to‘qnash kelishgan. Ulardan 5tasida "Hilol" zafar quchgan bo‘lsa, 3 bellashuv durang bilan yakunlangan. "Paxtakor" o‘zaro o‘yinlarda 5 to‘p kiritgan bo‘lsa, raqib 15 bor gol urgan. Igor Sergeev ikki bor Riyod jamoasi darvozasini ishg‘ol qilishga erishgan.
"Paxtakor" hamda "Al-Hilol" Osiyo Chempionlar Ligasida eng ko‘p marta qatnashgan klublar hisoblanadi - 19tadan.
"Hilol" tarkibida Bono, Kulibali, Kanselu, Milinkovich-Savich, Nevesh, Malkom, Salim Davsari, Mitrovich singari yulduzlar harakat qilishmoqda.
"Paxtakor" va "Al-Hilol" jamoalari o‘rtasidagi nimchorak final bahsi 4 mart, seshanba kuni "Jar" stadionida 21:00da boshlanadi. Javob uchrashuvi 11 mart kuni Riyodda bo‘lib o‘tadi.
