Суперлига жамоаларининг 2025 йилги расмий мусобақалари бугун старт олди. «Нефтчи» эса чемпионатнинг биринчи баҳсини эртага Тошкентда «Бунёдкор» клуби билан ўтказади. Бу жамоалар ўртасидаги беллашувлар азалдан жуда жиддий ва муросасиз кураш остида ўтиб келган.

Қизиқарли статистика

Миллий чемпионатимиз доирасида фарғоналиклар «Бунёдкор» футбол клуби билан 30 марта юзлашган. Буларнинг 8 тасида «Нефтчи» қўли баланд келган, 18 та учрашувда «Бунёдкор» устун бўлган, 4 та беллашувда эса жамоалар муроса кўчасини танлаган. Тўплар нисбати 23-43 тошкентликлар фойдасига.

«Нефтчи» бошқарувига Виталий Левченко келгач жамоа «Бунёдкор»га қарши Суперлига ва кубок ўйинлари доирасида 6та учрашув ўтказган. Шулардан 4 тасида фарғоналиклар ғалаба қозонишган, 1 та дуранг ва 1 та мағлубият қайд этилган.

2024 йил 3 ноябрда «Бунёдкор» клуби Фарғонада «Нефтчи»дан 2:1 ҳисобида мағлубиятга учраган бўлса ҳам, кейинги 3 та учрашувни мағлубиятсиз якунлаган. «Нефтчи» жамоаси эса ўтган йил мавсумининг сўнгги 10 баҳсини мағлубиятсиз ўтказишга эришган.

Жамоаларнинг Тошкентда бўлиб ўтган охирги 5 учрашув натижалари қуйидагича:

01.06.2024. «Бунёдкор»-«Нефтчи» - 0:3
28.10.2023. «Бунёдкор»-«Нефтчи» - 2:1
08.09.2022. «Бунёдкор»-«Нефтчи» - 1:2
12.07.2018. «Бунёдкор»-«Нефтчи» - 2:1
15.09.2017. «Бунёдкор»-«Нефтчи» - 2:0

Нефтчи» ФК матбуот хизмати