Қатар футбол ассоциацияси президенти шайх Ҳамад бин Халифа бин Аҳмад ал-Тани Эронга қарши ўйиндаги мағлубиятдан кейин мухлисларнинг кўнглини кўтаришга уринди.

"Эронга қарши ўйинда 3 очкони қўлга киритиб, мухлисларни хурсанд қилмоқчи эдик, аммо, насиб қилмаган экан, бунинг уддасидан чиқа олмадик. Биз ғалаба қозониб, ЖЧга чиқиш учун яхши имконият ҳосил қилишни истагандик, афсуски, бундай бўлиб чиқмади. Бунинг учун ишқибозлардан узр сўрайман. ЖЧга чиқиш бизнинг орзуимиз эди. Энди биз бунинг сабабларини таҳлил қилишимиз керак. Назаримда, келажакда терма жамоадаги ёш футболчиларнинг бизга ҳали кўп ёрдами тегади. Улар ёрдамида навбатдаги ЖЧга чиқиш орзуимизни амалга оширамиз, деб ўйлайман", дейди мамлакат футболи раҳбари.

"Шубҳасиз, натижадан афсусдаман. Барча мухлислар каби менга ҳам буни ҳис қилиш оғир. Ҳозирча бош мураббий Фаҳад Тани тақдири ҳақида фикр билдириш нотўғри бўлади. Боз устига, қисқа муддатдан кейин бизни Ўзбекистонга қарши баҳс кутиб турибди. Ушбу ўйиндан кейин вазиятни чуқурроқ ўрганиб чиқамиз", дейди Ҳамад ал-Тани.