“Суперлига ва Пролига регламенти”нинг 17.13-бандида клубдан ҳар қандай расмий учрашувда фақатгина мавсум учун танланган уй либосида майдонга тушиши талаб этилиши кўрсатиб ўтилган.
Суперлига клублари 2025-йилги мавсум учун уй либосини Лигага тақдим этган бўлиб, энди улар ўз мухлислари қаршисида фақатгина шу либослардан фойдаланади. Сафарда ҳаракат қилаётган жамоа либоси шундан келиб чиққан ҳолда белгиланади.
Аввалги мавсумларда ҳам клублар уй либосини белгилаб олган, бироқ доим ҳам қоидага амал қилмаган. Айрим мураббийларнинг иримчилиги ва бошқа асоссиз ҳолатларга кўра клуб уй либосини исталган вақтда алмаштириб келган. Бу айрим ҳолатларда ҳар икки жамоа ўртасида тушунмовчиликларга ҳамда ўзи учун қадрдон стадионга жамоаси либоси билан бир хил рангда кийиниб келаётган мухлисларга ноқулайлик туғдирган.
Мураббий ёки раҳбарият вақти-вақти билан алмашиб туради. Шундан келиб чиқиб, Лига клубнинг персоналдан устун бўлиши, мерч масаласида эса бир неча йиллик қадриятлар ҳамда ишқибозлар фикри инобатга олинишини мақсадга мувофиқ деб ҳисоблайди.
