Суперлиганинг 2-туридан ўрин олган «Андижон» – «Насаф» (1:1) учрашувидан кейи ташкил этилган матбуот анжуманида дастлаб меҳмонлар бош мураббийи Рўзиқул Бердиев журналистларнинг саволларига жавоб қайтарди.

— Ажойиб ўйин бўлди. Бу даражада, бундай муҳитда тўп суриш ҳар бир жаммоа учун ёқимли. Бунинг учун албатта стадиондаги мухлисларга бундай муҳитни яратиб беришгани учун миннатдорлик билдириш керак. Кўриниб турибдики, бу жамоага эътибор, мухлислари бор ва энг яхши ишқибозлардан бири. Ўйинга келадиган бўлсак, учрашув бошидаги босимга бардош бера олмадик. Шунинг учун хатолик эвазига гол ўтказиб юбордик. Ундан кейин тўпни назорат қилиш бизга жуда муҳим эди. Тўпни назорат қилганимиздан кейин вазиятлар ярата олдик. Дурангга эришиб гол урдик. Иккинчи бўлимдаги вазиятларга келадиган бўлсак, менимча иккита жамоага ҳам ғалабани ўз томонига оғдириш учун нафақат курашга бой ўйин, балки вазиятлар ҳам бўлди. Лекин дуранг натижа қайд этилди ва менимча, бу учрашувга мосроқ бўлди, деб ўйлайман.

— Биринчи турда «Сўғдиёна»га қарши учрашувда жамоангиздаги бир қатор футболчилар бугунги баҳсда майдонга тушишмади. Ротация бўлишига сабаб нима?

— Баъзи-бир ўзгаришларга мажбур бўлдик. Шерзод Насруллаев жароҳат олди. Хебай шундоқ ҳам қатнашмаганди. Чолович билан Нуруллоевни позиция бўйича алмаштирдик. Улар бир чизиқда ўйнашади. Таркибда янгилик қилишимиз керак эди. Чунки таркибимизда ўйинчилар бор, ҳаммасига ишонишимиз керак. Ўйлайманки, бу нарса рақибга ҳар доим қийинчилик туғдиради. Шу боис ротацияга кўп эмас, озгина қўл ургандик. Биласизлар, Голбан ҳам марказий ҳимоячимиз. Бу сафар Ғолибни ўрнига уни майдонга туширишга қарор қилгандик.

— Хебай биринчи турда ҳам йўқ эди ва бу сафар ҳам қайдномага киритилмади. Туркияда ўртоқлик ўйинларида майдонга тушганди.

— Уни бетоб деб олдинги сафар ҳам айтгандим. Ҳозир даволаняпти. Балки ҳозир бўладиган танаффус унга қўл келиши мумкин. Бу вақтда жамоамиз сафига қайтади.