"Манчестер Сити" ярим ҳимоячиси Кевин де Брюйне жорий мавсум якунлангач жамоасини ўзгартириши мумкин. Бу ҳақда Todofichajes портали саҳифаларида маълум қилинди.
Манбага кўра, 33 ёшли бельгиялик хавбек хизматига Мадриднинг "Атлетико" клуби қизиқиш билдирмоқда. "Матрасчилар" юлдуз футболчини текинга қўлга киритмоқчи, чунки унинг "шаҳарликлар" билан шартномаси 2025 йил июнь ойи охирида тугайди. Кевин 2015 йилдан бери Англиянинг топ-клуби сафида тўп тепиб келмоқда.
Ярим ҳимоячи Англия Премьер-лигасининг жорий мавсумида 20 та ўйин ўтказди. Де Брюйне иккита гол урди ва олтита голли узатмани амалга оширди.
