2022-йилдан бери РПЛ Европанинг футбол оламида қисман изоляция қилинди. Топ чемпионатлардан футболчи жалб қилиш қийинлашди, чунки кўплаб ўйинчилар Чемпионлар Лигаси ва Европа Лигаси йўқлиги сабабли Россияга кўчиб ўтишга тайёр эмас. Умуман олганда, трансфер бозори анча торайди.
Sports.ru сайтида блог юритадиган Илья Васильев 2022-йил ёзидан буён РПЛга келган энг яхши 15 та хорижлик футболчи рейтингини тузди. ЦСКА ярим ҳимоячиси Аббос Файзуллаев ушбу рейтингда 8-ўринга жойлаштирилди.
"Аббосбек Файзуллаев (ЦСКА)
38 ўйин, 7 гол, 10 ассист
ЦСКА томонидан жуда кичик суммага сотиб олинган ва эҳтимол, асосий таркиб учун номзод сифатида қаралмаган. Лекин у дарҳол жамоанинг асосий юлдузларидан бирига айланди. 2023-йил кузида 20 ёшли Файзуллаев инқирозга учраган ЦСКАда ўзини ажралмас футболчи сифатида кўрсатди. У ўзининг ақлли ҳаракатлари, дриблинг ва аниқ узатмалари билан жамоанинг ҳужумдаги муаммоларини ҳал қилди.
Файзуллаев айрим пайтларда Ўзбекистон ёшлар терма жамоаси мусобақалари (Осиё кубоги-2024, U-23 Осиё кубоги-2024 , Олимпиада-2024) сабабли жамоадан узоқлашган. Аммо қайтганида ёрқин ўйинлари билан ажралиб турди. У ЦСКАдаги энг самарали футболчилардан бири бўлиб, келажакда фойдали трансферга айланиши мумкин", — дея таъриф берилди ўзбекистонлик футболчига.
