ЖЧ-2014 саралаши 4- босқич, 9-тури доирасида сафарда Жанубий Корея терма жамоасига қарши баҳсга тайёргарлик кўраётган Ўзбекистон миллий терма жамоаси 8 июнь куни Пекинда машғулотларга киришди.

Хабарингиз бор, 6 июнь куни Миржалол Қосимов бош мураббийлигидаги Ўзбекистон миллий терма жамоаси Хитойнинг Хаххот шаҳрида Хитой миллий терма жамоасига қарши ўртоқлик учрашувида майдонга тушган ва 2:1 ҳисобида ғалаба қозонган эди. Ушбу ўйин якунига етгач, миллий терма жамоа делегацияси 7 июнь куни Пекиндан Жанубий Корея пойтахти Сеулга учиши керак эди. Аммо, ноқулай келган об-ҳаво шароити туфайли, миллий терма жамоа делегацияси жойлашган рейс қолдирилган.

Ўзбекистон Футбол Федерацияси матбуот хизмати бошлиғи Санжар Ризаевга кўра, 8 июнь куни Миржалол Қосимов бошчилигидаги Ўзбекистон миллий терма жамоаси Пекинда, Олимпиада ўйинлари учун бапро этилган шаҳарчадаги майдонда машғулотларни бошлади. Ўзбекистон миллий терма жамоаси делегацияси эса 9 июнь куни Пекиндан Сеулга учиб кетиши режалаштирилмоқда.