Йозуа Киммих Италияга гол уришга ёрдам берган болбойга дастхатли тўпни совға қилди.
Кеча Германия терма жамоаси Италия билан дуранг ўйнади, аммо икки ўйин натижасига кўра (2:1, 3:3) УЕФА Миллатлар лигаси ярим финалига йўл олди.
Ҳисоб 1:0 бўлиб турган вақтда Жанлуижи Доннарумма майдон ўйинчилари билан мулоқотда бўлганида Киммих бурчак зарбасини тезлик билан амалга оширди. Дарвозабон ва рақиб ҳимоясининг хатосидан фойдаланган Жамал Мусиала бўш қолган дарвозани ишғол этди.
Киммихга тўпни бу вазиятда 15 ёшли болбой Ноэль Урбаняк етказиб берди. Бунинг учун у ўйиндан сўнг "Бавария" ярим ҳимоячисидан дастхатли тўпни олди ва терма жамоанинг спорт директори Руди Феллер унга кейинги уй ўйинига бепул чипта ваъда қилди.
"Мен бурчакдаги байроқча ёнида туриб, Киммих билан бир-биримизга қараб турганимизни ва унга тўп кераклигини кўрдим. Мен дарҳол унга тўп отдим ва гол бўлди. Мен жуда бахтли эдим," - деди бола RTL'га берган интервьюсида.
"Учаласи ҳам мутлақо жаҳон даражасидаги футболчилар," - деди терма жамоа бош мураббийи Юлиан Нагелсманн Киммих, Мусиала ва Урбанякни назарда тутиб.
