“Реал”нинг бразилиялик футболчиси Родриго фаолиятини Англия Премьер-лигасида давом эттириши мумкин. Ҳужумчи Мадридда қолиш истагини очиқ билдирганига қарамай, Пеп Гвардиола уни “Манчестер Сити”га олиб келишга ҳаракат қилмоқда.

Англия клуби таркибни тубдан ўзгартиришга тайёргарлик кўрмоқда. Шу боис “Сити” раҳбарияти бразилиялик футболчининг отаси билан учрашув ўтказиб, Родригога юқори маош ҳамда унинг ўнг қанот ҳужум чизиғида доимий ўйин амалиётини таклиф қилган.

Манбаларга кўра, “Манчестер Сити” вакиллари ва Родригонинг отаси ўртасидаги учрашув икки-уч ҳафта олдин бўлиб ўтган. Футболчининг атрофидагилар эса бу маълумотни рад этмоқда.

Теам Talk хабарига кўра, “Манчестер Сити” Родригони ёзги трансфер ойнасидаги асосий нишонларидан бири сифатида кўриб чиқмоқда. Бироқ трансфер жуда қимматга тушиши мумкин, чунки “Реал” бразилиялик футболчини жамоанинг асосий ўйинчиларидан бири деб ҳисоблайди ва Чемпионлар Лигасидаги принципиал рақибига сотишга рози бўлмаслиги мумкин.

Родригонинг Мадрид клуби билан шартномаси 2028 йилнинг ёзигача амал қилди. Transfermarkt портали унинг қийматини 100 млн еврога баҳоламоқда.